നരകവാതില്‍ തുറക്കുമ്പോള്‍..
സൂക്ഷിച്ചു വായിക്കണം..
അമേരിക്കയില്‍ നിന്നുള്ള വാര്‍ത്തയാണ്.
അമേരിക്കയാണ് – ലോക ശക്തിയാണ്, ലോകോത്തര സാമ്പത്തിക ശക്തിയാണ്. ആരോഗ്യ സംവിധാനങ്ങള്‍ മികച്ചതാണ്.
ന്യൂയോര്‍ക്കില്‍ നിന്നാണ്
അമേരിക്കയിലെ തന്നെ ഏറ്റവും സമ്പന്നമായ നഗരമായ ന്യൂ യോര്‍ക്ക് ഉള്‍പ്പെട്ട സംസ്ഥാനമാണ്. ആളോഹരി വരുമാനം മുപ്പത് ലക്ഷതിന് അടുത്ത് വരും.
ലോകത്തെ ഏറ്റവും പ്രശസ്തമായ ആശുപത്രികള്‍ ഒക്കെ ഉള്ള നഗരമാണ് ന്യൂ യോര്‍ക്ക്.
രണ്ടാഴ്ച മുന്‍പ് അവിടെയും ഏതാണ്ട് ഇപ്പോള്‍ നമ്മുടെ സ്ഥിതിയായിരുന്നു
കുറച്ചു കൊറോണ കേസുകള്‍ ഒക്കെയുണ്ട്. പക്ഷെ അവിടുത്തെ ആരോഗ്യ സംവിധാനങ്ങളുടെ ഉള്ളില്‍ എളുപ്പത്തില്‍ കൈകാര്യം ചെയ്യാനുള്ളതേ ഉള്ളൂ.
പിന്നെ ഒന്ന് പത്തായി, പത്തു നൂറായി, നൂറ് ആയിരമായി. ആരോഗ്യപ്രവര്‍ത്തകര്‍ ഒന്ന് കണ്ണടച്ച് തുറന്നപ്പോഴേക്കും കൊറോണ അവരുടെ സംവിധാനങ്ങളുടെ പരിധിയില്‍ നില്‍ക്കാതായി.
നാലായിരം വെന്റിലേറ്ററുകളാണ് അവിടെ ഉണ്ടായിരുന്നത്. ഏഴായിരം എണ്ണം പുതിയതായി വാങ്ങി. ഇനി രണ്ടായിരം കൂടി അമേരിക്കയുടെ കേന്ദ്ര സംവിധാനങ്ങളില്‍ നിന്നും കിട്ടും.
പക്ഷെ മതിയാവില്ല. ചുരുങ്ങിയത് മുപ്പത്തിനായിരമെങ്കിലും വേണമെന്നാണ് ഗവര്‍ണ്ണര്‍ പറയുന്നത്.
ഇപ്പോഴത്തെ കണക്കനുസരിച്ചു മുപ്പത്തി ഏഴായിരത്തിലധികം കേസുകള്‍ ഉണ്ട്. ഓരോ മണിക്കൂറിലും അത് കൂടുന്നു.
മരണം മുന്നൂറ്റി എണ്‍പത് കടന്നു.
അപൂര്‍വ്വമായ സാഹചര്യങ്ങളില്‍ അപൂര്‍വ്വമായ കാര്യങ്ങള്‍ ചെയ്യേണ്ടി വരും.
‘We’re going so far as to trying an experimental procedure where we split the ventilator,’ Cuomo said Tuesday. ‘We use one ventilator for two patients. It’s difficult to perform, it’s experimental, but at this point we have no alternative.’
ഒരു വെന്റിലേറ്റര്‍ രണ്ടായി പകുത്ത് രണ്ടു പേര്‍ക്കായി ഉപയോഗിക്കാനുള്ള ശ്രമമാണ്.
ഇത് മാര്‍ച്ച് മാസത്തിലെ അമേരിക്കയാണ് !
ഇത് ഫെബ്രുവരിയിലെ ഇറ്റലിയായിരുന്നു.
ഇത് ജനുവരിയിലെ ചൈനയായിരുന്നു.
ഇത് ഏപ്രില്‍ മാസത്തിലെ കേരളമാകാം.
അറിഞ്ഞില്ല എന്ന് മാത്രം പറയരുത്.
കൊറോണ നമ്മുടെ പടിവാതില്‍ക്കല്‍ എത്തുമ്പോള്‍ അതിനോട് യുദ്ധം ചെയ്യാന്‍ കേരളത്തില്‍ എത്ര വെന്റിലേറ്ററുണ്ട് ?, ഞാന്‍ അന്വേഷിച്ചില്ല. ചില ചോദ്യങ്ങളുടെ ഉത്തരം നമ്മുടെ ആത്മവിശ്വാസം കെടുത്തിയേക്കാം.
പുതിയതായി വാങ്ങുക എന്നത് പണമുണ്ടെങ്കില്‍ പോലും എളുപ്പമല്ല. ലോകത്തെ എല്ലാ രാജ്യങ്ങളും ഇപ്പോള്‍ വെന്റിലേറ്ററിന് പുറകിലാണ്.
വെന്റിലേറ്റര്‍ പോയിട്ട് ആരോഗ്യ പ്രവര്‍ത്തകര്‍ക്കുള്ള വ്യക്തി സുരക്ഷാ ഉപകരണങ്ങള്‍ പോലും ഇറ്റലിയില്‍ പോലും ക്ഷാമത്തിലാണ്. മാസ്‌കുകളും മറ്റും രണ്ടാമത് എങ്ങനെ വൈറസിനെ മാറ്റി ഉപയോഗിക്കാമെന്നാണ് അവരിപ്പോള്‍ പരിശോധിക്കുന്നത്.
ഈ യുദ്ധം നമ്മുടെ പടിപതില്‍ക്കലെത്താന്‍ ഇനി അധികം സമയമില്ല. ആരോ പറഞ്ഞപോലെ അല്പം ഈഗോ ഉള്ള വൈറസാണിത്. ക്ഷണിച്ചാല്‍ മാത്രം അകത്തേക്ക് വരുന്ന ഒന്ന്.
സാമൂഹിക അകലം പാലിക്കാതെ ക്വാറന്റൈന്‍ നിയമങ്ങള്‍ ലംഘിച്ച് പോലീസിന്റെ കണ്ണുവെട്ടിക്കുന്നത് മിടുക്കാണെന്ന് കരുതി നമ്മുടെ സഹോദരന്മാര്‍ ഈ വൈറസിനെ ക്ഷണിച്ചു വരുത്തുന്നു. സ്വന്തക്കാര്‍ക്കും ബന്ധുക്കള്‍ക്കും നാട്ടുകാര്‍ക്കും ഒക്കെ വിതരണം ചെയ്യുന്നു.
ഈ യുദ്ധം ജയിക്കണമെങ്കില്‍ സമൂഹ വ്യാപനം തടഞ്ഞേ പറ്റൂ. അതിന് ഇന്ന് നമ്മുടെ കയ്യില്‍ അധികം ആയുധങ്ങള്‍ ഇല്ല. ഉള്ളത് സോഷ്യല്‍ ഡിസ്റ്റന്‍സിങ്ങ് മാത്രമാണ്. ആ ദുര്‍ബ്ബലമായ കോട്ടയിലാണ് ഈ പുറത്തിറങ്ങി നടക്കുന്ന സാമൂഹ്യ ദ്രോഹികള്‍ വിള്ളലുണ്ടാക്കുന്നത്.
അവരെ ഇന്ന് നിയന്ത്രിച്ചില്ലെങ്കില്‍ ഏപ്രില്‍ മാസത്തിലെ കേരളം മാര്‍ച്ചിലെ ന്യൂ യോര്‍ക്കും ഫെബ്രുവരിയിലെ ഇറ്റലിയുമാകും. സംശയം വേണ്ട.
മുന്നറിയിപ്പ് കിട്ടിയില്ല, വേണ്ടപോലെ ഉണ്ടായില്ല എന്നുള്ള പരാതിയൊന്നും വേണ്ട.
സര്‍ക്കാര്‍ പറയുന്ന മുന്‍കരുതലുകള്‍ സ്വീകരിക്കുക, മുന്‍കരുതലുകള്‍ എടുക്കാത്തവരെ പറഞ്ഞു മനസ്സിലാക്കുക അല്ലെങ്കില്‍ റിപ്പോര്‍ട്ട് ചെയ്യുക.
ഇത് നമ്മുടെ ജീവന്റെ മാത്രം വിഷയമല്ല, ഒരു സംസ്‌കൃത സമൂഹം എന്ന നിലയില്‍ നമ്മുടെ ഭാവിയുടെ പ്രശ്‌നം കൂടിയാണ്.
ഈ യുദ്ധം നമുക്ക് ജയിച്ചേ തീരു.
സുരക്ഷിതരായിരിക്കുക
കടപ്പാട്: മുരളി തുമ്മാരുകുടി (ഐക്യരാഷ്ട്രസഭയുടെ ദുരന്ത ലഘൂകരണ വിഭാഗം മേധാവി)